【蘋果即時】【阿媽有微言】心穎洗腦結婚要獨立？馬明：暫時未有呢個話題

【蘋果即時】【阿媽有微言】心穎洗腦結婚要獨立？馬明：暫時未有呢個話題

馬國明同黃心穎呢對戀人越來越公開，喺人前人後都攞正牌放閃，話晒拍拖咗都一段時間，大家都好自己咁關注佢哋嘅婚期，今日就有周刊道話，出咗名孝順嘅馬明，曾講過就算結咗婚都會同爸爸媽媽一齊住，點知自從同心穎拍拖之後，喺女友嘅洗腦之下，開始打消呢個念頭，要努力儲錢再買樓！

報道仲話馬明為咗女友，一洗佢嘅慳家本色，好似買衫買褲轉過啲形象，而且仲豪花20萬買咗對情侶戒，所以有傳馬媽媽喺呢方面有啲微言，不過話晒仔大仔世界，最緊要個仔鍾意。日前佢哋又俾人影到拍拖行又一城，都係一般情侶拍拖會做嘅事，即係行街睇戲兼食飯，不過馬明見到有記者影相，刻意將戴咗戒指嘅手插喺褲袋！

今日馬明接受傳媒訪問，佢話：「多謝大家關心呀，其實除咗真係要努力儲錢之外，全部嘢都唔係真，我哋暫時都未有結婚呢個話題，始終佢仲係好年輕，仲想喺事業上先衝刺一下，所以暫時未有呢個話題，呢個topic亦未喺個腦出現。」馬明仲話：「儲錢同其他嘢冇關，o依家香港嘅樓價又升得咁恐佈，咁辛苦搵啲錢返嚟，起碼唔好令佢貶值，最少都可以抗到個通漲，所以一定儲錢，再加上我哋呢行冇乜保障，可能出年啲觀眾又未必鍾意睇你，到時收入就少咗好多，所以咪要保障吓自己，如果到儲到錢，咪再去做吓啲穩陣嘅投資，為咗自己同屋企人將來嘅保障！」

至於心穎亦都話：「冇啲咁嘅事，多謝關心。」