【On.cc】拍戲Call白車！高海寧撞親後腦變鬥雞眼

【On.cc】拍戲Call白車！高海寧撞親後腦變鬥雞眼
藝人馬國明及高海寧（高Ling）為劇集《C9特工》，日前以「夫妻檔」到南生圍拍攝影婚紗照場口，馬國明於33度烈日當空下仍身穿禮服拍攝，全程面不改容，笑言為拍攝都要頂硬上！

失平衡撻落地

身穿入膊露香肩哩士婚紗的高Ling亦非常專業，事關她是帶傷上陣，受訪時她自爆之前拍攝個人戲份時受傷，撞親後腦兼盤骨位瘀晒：「當時係喺街市拍緊，咁有塊滑板，上面就有兩個菜籮，自己兩隻腳都企咗入去，一拉條繩向前行就失平衡撻落地。（有即刻去睇醫生？）有呀，有即刻Call白車，跌低咗都要抖一抖先起到身，入院之後就有照腦掃描、X光，睇吓有冇事，好彩都OK冇事，即刻返到工。」

產生後遺症

問到後腦撞傷位置已消腫？她表示需時康復，不過就再爆產生後遺症：「會再複診照磁力共震嘅，主要係對眼依家望嘢容易鬥雞，向右望又會有重影，醫生話可能係撞擊影響到入面啲神經線，眼肌依家就唔係好控制到，慢慢會好番。」不過她在劇中飾演特工，打鬥戲份少不免，問到之後會否錫身拍攝？她就解釋今次只是意外，希望之後都可以親自落場，拒絕用替身。高Ling又慘爆話受傷後原想打畀媽媽報憂，不過反被「驚喜」：「細佬早前去咗日本旅行，我喺白車打唔到畀媽咪，原來佢同爸爸臨時買機票飛去日本搵細佬，受咗傷都冇人陪，好失落！」

讚高Ling專業

身旁的馬國明無奈指當時自己不在場，對方受傷後才抵達、緣慳一面：「臨去到先收到消息，都好擔心，有上十字車睇一睇佢，問佢有冇事，其實都有叫佢休息多日嘅，但佢話冇所謂、繼續拍攝，好專業！」之後拍攝會否「錫」住高Ling？他即謂當然會，又為對方大呻辛苦：「佢嘅戲份有九成咁滯，仲有好多打戲。（咁你自己都有打戲？）後段先有多啲。（都會錫身？唔怕女友黃心穎擔心？）都唔驚，之前拍過好多，今次啲打戲都係輕鬆、搞笑為主，都唔會有太大挑戰。」