[2018/6/23][HK01] 馬國明心穎拍拖睇戲有共識：睇時間而定

馬國明與黃心穎在《宮心計2深宮計》中愛得難捨難離又高調，最近一幕甘若芊（黃心穎飾）高調向暗戀對象任三恕（馬國明飾）示愛，更是讓人看完心跳加速。不過現實之中，馬國明與黃心穎的戀愛，比起劇情卻是簡單的多。馬國明接受《香港01》訪問時表示，拍拖時也與大家一樣會去食飯睇戲。

馬國明：「近排都比較忙啲，因為我有兩套劇拍緊，佢又拍緊《牛下女高音》，所以變咗都有一段時間冇出去食飯睇戲，（唯有）再抽時間囉，冇辦法㗎，（大家）都要工作。（平時同心穎睇啲咩戲多？）有時有套戲好想睇嘅，就會計劃定。如果冇話特別邊套戲想睇，就睇時間囉。我同佢都係比較鍾意睇戲，我同佢（睇咩戲）都冇乜所謂嘅，變咗有時後就會入去撞。都幾開心，有時大家冇期待，但係後尾又發覺套戲幾好睇，就好似發掘左個寶藏咁。我哋睇戲完全係隨心嘅。」


馬國明同黃心穎拍拖都係食下飯睇下戲。（林迅景攝）

藝人拍拖行街睇戲食飯例必吸引「狗仔隊」跟蹤拍攝，不少藝人我會覺得煩厭，但原來馬國明對此又沒有太大反感。「我哋唔會（戴帽戴口罩出街），我哋好free㗎。（行過俾人認到呢？）其實都冇乜所謂啦，我哋有時食飯都見到有狗仔影相，我都係say個hi就算。其實依家啲狗仔都唔會煩我哋，因為學你話齋，都講過畀大家聽，『我哋了解緊』，都冇乜所謂。」

馬國明今日出席《宮心計2深宮計》周邊產品義賣活動。（林迅景攝）