【即時娛樂】【每個月點算好】自爆怕見血 唐詩詠：睇到自己滴血落地下就暈咗

【即時娛樂】【每個月點算好】自爆怕見血 唐詩詠：睇到自己滴血落地下就暈咗

左起馬國明、唐詩詠、郭晉安、李佳芯

馬明同唐詩詠今次演離咗婚嘅夫婦。

郭晉安、馬國明、唐詩詠同李佳芯等今日喺將軍澳電視城試新劇《白色強人》嘅造型，馬明同老友唐詩詠今次演離咗婚嘅夫婦，話晒之前網民一直都話佢哋兩個好襯，加上佢哋又識咗咁耐，演情侶自然默契十足，今次係馬明繼《On Call 36小時》系列再扮醫生，佢透露為咗拍得逼真啲，仲安排咗真正醫生教授佢哋有關醫學嘅知識，令佢哋可以掌握個角色點樣去演。

唐詩詠喺訪問中，佢話受《妙手仁心》影響，之前已好想演醫生，不過佢自爆怕血，見到血會暈，有次睇到自己滴咗滴血落地下，佢就暈咗，馬明就搞笑叫唐詩詠唔使怕，佢會幫唐詩詠做人工呼吸，馬明仲笑言無懼女友黃心穎呷醋：「救命啊!吃甚麼醋呢，救人最重要。」

早前先同心穎BB行孖咇去樂易玲屋企團拜，不過馬明就話未去心穎屋企拜年，因為女友屋企人唔喺香港，至於馬家對心穎BB係咩印象，馬明竟然扮唔知，仲交個波俾阿媽：「我要問一問我媽。」

此外，郭晉安喺新劇《白》演醫生，要幫病人做開腦手術，安仔笑言好在唔怕見到内臟，佢仲話可以試吓買豬腦返屋企練戲，講到仔女嘅利是，安仔話暫時幫佢哋保管住，等仔女有咩要買，先再俾佢哋用呢筆錢。