【蘋果即時】【麻甩仔keep紅底】馬國明話生得佢出 蔡思貝搶住嗌：爸爸！

【蘋果即時】【麻甩仔keep紅底】馬國明話生得佢出 蔡思貝搶住嗌：爸爸！

馬國明同蔡思貝今日喺尖沙嘴The One出席新春活動，同粉絲玩遊戲及獻唱。台上兩人分享過農曆新年嘅習俗，馬明指每年媽媽都會買桃花：「我圍住行幾百個圈0架。」身旁嘅蔡思貝即笑謂：「你唔使啦！」馬明即鬼馬回應：「咩唔使呀？行幾千個圈添呀。」

馬明又話每年必定放紅底褲喺櫃桶，問佢今年準備好紅底未？馬明話屋企長期有條紅底喎：「年年都擺櫃桶底，好似人哋擺符咁，新0架！冇著過。」問到有指佢被女友黃心穎揸乾？馬明笑謂：「點會呀？可能我成日話自己窮，不過梗係話自己窮0架啦。平時出街都各有俾錢，我請佢食飯，佢請我睇戲。」

問到佢同心穎情人節點過？馬明話要開工，仲笑指心穎仲忙過佢，至於買咩情人節禮物？佢話：「呢啲係surprise，唔話畀你地知。」

至於6號就係蔡思貝嘅27歲生日，馬明聞言即笑指自己生得佢出，蔡思貝即嗌：「爸爸！」馬明又搞笑叫佢畀家用。問蔡思貝會唔會同緋聞男友余德丞和麥秋成慶祝？佢話啱啱同德丞拍完旅遊節目，而同秋成就係好朋友：「其實27歲，我想拼搏啲做嘢先。」