【2018/1/20】黃心穎夜會馬國明被識破 急坐「降魔的」逃離1881

[蘋果日報] 黃心穎夜會馬國明被識破 急坐「降魔的」逃離1881 2018.01.20

今日黃心穎同唐詩詠出席活動時，事先張揚話要練定馬國明嘅天然呆，仲放風話或者會同馬國明以及家人食飯慶祝29歲生日，原來係真0架！仲係今晚添！

頭先講到，黃心穎去完活動後，先返樂富爸爸嘅屋企，換完衫再返番去自己位於油塘嘅家。約傍晚六點半左右，黃心穎同三家姐黃心慧一齊離開，上的士去到尖沙嘴1881、海利公館嘅凱芸軒食晚飯。兩人約7點15分到達。兩女一路走來似乎唔係好認得路，兜咗個圈先上到去。

傳媒即追問心穎BB同邊個食飯啦？佢就話：「同屋企人，同我慶祝生日。」咁馬國明會到嗎？心穎就不置可否，之後直入餐廳。咁啱門口有一對新人影緊婚紗相，咦，好兆頭喎！

到九點幾左右，心穎BB與家人食完飯，拉隊走人啦，咦，又真係唔見馬明喎……心美心妙心慧心穎四姊妹同雙親仲有姐夫都喺度，一家人企定定俾傳媒影合照，等記者有功課交，真係超級Nice。影完之後心穎仲接受傳媒訪問。問佢馬國明今晚有出席嗎？佢就好肯定咁話：「冇！」

就在心穎BB受訪期間，留守後門嘅記者就發現……馬國明喎！

原來心穎BB用聲東擊西方法，自己「以身犯險」應付傳媒，同一時間安排男友由後門離開避追訪。正準備上「降魔的」嘅馬國明見自己行藏敗露，禁不住露出天然呆個可愛樣……
又去番心穎BB嗰邊，大概嗰陣佢都未知男友已經曝咗光，於是仲同屋企人一行七八人喺1881附近拍照留念，等傳媒可以影多陣，預鬆啲時間俾馬明離開現場……用心良「甜」呀！


呢個時候，馬明喺後門坐的士離開，睇個表情就知佢好尷尬…


即刻收拾心情打招呼，say個bye就離開。