[2017/12/23]【蘋果娛樂】黃心穎帶馬國明「白雪天地」見家長 夠晒貼地

【蘋果娛樂】        2017/12/23

Um…係開心事嚟嘅，應該同大家分享下。

開心事就係，呢期頻傳分手嘅馬國明黃心穎，其實冇散到嘅，今日仲去咗聖誕新景點：白雪天地見家長添！

一對小情侶冰天雪地見家長…咦…咁凍，可以攬得好實喎！

讀者陳小姐今日就喺荔枝角D2 Place嘅白雪天地，見到馬國明同心穎BB，仲有心穎家姐心妙（Shelby）帶埋小朋友去玩。

白雪天地係香港「飄雪始祖」——今年已經係第三年。免費入場，但等入場大約個零鐘左右啦。個location位於商場天台，成萬二呎，有雪地，有冰屋，如果想睇飄雪，要購物滿一定金額先得。簡單嚟講呢度就係一個相當之平民化嘅打卡勝地。

之前有周刊話心穎BB咩識咗個富二代，所以先至飛馬明。咁如果心穎真係咁，佢就唔會去商場天台同男友睇飄雪啦！

陳小姐見到馬明同心穎一齊嗰陣，大約係三點幾左右，馬明同心穎已經係「玩完」——係喺「白雪天地」玩完，準備離開。陳小姐話，馬明戴上眼鏡同帽，甚為低調；同化淡妝嘅心穎全程前後腳，主要都係同心妙嘅小朋友傾偈，陳小姐話短短嗰分零鐘唔夠，已經覺得馬明好錫小朋友。

一邊傳分手，一邊拍住檔除夕搵快錢，唔係唔可能，馬明心穎呢Pair就係。傳媒搵過馬明，問佢「白雪天地」好唔好玩，佢覆咗個「No！」又話：「多謝關心呀！」

至於黃心穎今日回應傳媒時，就話嗰陣係陪二家姐啲小朋友去玩，問到係咪證明冇分手，心穎笑道：「其實不嬲都話冇事，只係大家講之嘛！不過去都見到好多小朋友，已經9秒9咁離開，點知都俾人影到！」

讀者陳小姐話馬明同啲小朋友玩得好投入，心穎就話：「OK呀，佢不嬲都係錫小朋友同老人家嘅人！」唔知家姐對馬明印象又係點呢？佢話：「幾好呀，OK呀。」過咗二家姐嗰關，咁爹哋嗰關又過咗未呢？心穎就話：「大家好casually食咗個lunch囉，冇乜特別嘢，我屋企人好易相處。」至於有冇見過馬明媽咪，心穎就話：「哈哈哈，呢個就唔講喇！」




讀者陳小姐今日就喺荔枝角D2 Place嘅白雪天地，見到馬國明同心穎BB。（讀者提供圖片）


仲有心穎家姐心妙（Shelby）帶埋小朋友去玩。（讀者提供圖片）


陳小姐見到馬明同心穎一齊嗰陣，大約係三點幾左右，馬明同心穎已經玩完，準備離開。（讀者提供圖片）


問到係咪證明冇分手，心穎笑道：「其實不嬲都話冇事，只係大家講之嘛！」（資料圖片）


問到係咪證明冇分手，心穎笑道：「其實不嬲都話冇事，只係大家講之嘛！」（資料圖片）