［香港０１娛樂］ 發佈日期：2018-01-01 13:33
馬國明，黃心穎這一對情侶檔，適逢除夕夜商場倒數，齊聚一起搵「真銀」。2人就趁着倒數前的空檔時間，接受《香港01》訪問。馬國明說：「唔係第一次一齊出席活動，不過就係第一次一齊做countdown。」需知道，情侶檔一向都收得多啲「人工」。馬國明與黃心穎異口同聲的表示，「應該有多咗。」黃心穎補充說：「我好想睇到個糧單係一個surprise，哈哈。」
今年特別多情侶檔。
情侶檔出show人工高是常識吧。
新一年，當然會循例問下有甚麼新年願望。出名顧家又孝順父母的馬國明就説：「我每年嘅願望都係身體健康同埋一家人齊齊整整。可能有啲人會覺得我老土，其實我覺得每一年最緊要就係呢樣嘢。」黃心穎隨即咐和説：「我都覺得係，同埋最緊要開心，身邊嘅人都開心。而工作上有多啲新嘗試。」其實黃心穎在2017年也作了很多新嘗試，唱歌、跳舞，拍劇仲做埋第二女主角添。去年年頭更在中國橫店拍攝2018年的重頭劇《宮心計2：深宮計》。戲裏戲外與黃心穎都有「感情」的馬國明説：「希望深宮計出咗之後我地會有多啲一齊拍廣告嘅機會，又或者一齊登台。甚至乎去外地登台，美加，澳洲吖。（黃心穎說：大家都好等錢使。）可以請我哋去，哈哈。」
馬國明不嬲都出名孝順仔。
說起《宮心計2：深宮計》，黃心穎就大讚馬國明：「我覺得佢做對手係好好，因為佢交足戲俾你。我仲記得第一套劇第一場係同佢拍嘅，我嗰時客串《On Call 36小時2》。（馬國明說：做個病人㗎嘛。）我係臨時唔知替咗邊個人嘅，所以人生第一場戲係同佢（馬國明）拍。嗰時又唔可以話係粉絲，不過鍾意睇佢啲劇。睇rundown知道個對手係馬國明，我好緊張。」其實《On Call 36小時2》已經係5年前嘅劇，馬國明諗都唔使諗就講得出心穎BB嘅角色，真係好有記性吖。
《宮心計2：深宮計》2018年就有得睇，馬明同心穎BB仲有感情線添。
次次問馬國明，佢次次都會答「了解中」。咁究竟要了解幾耐呢？
在之前馬國明的《香港01》專訪中，他都表示與黃心穎的關係不會「刻意講，因為大家都明。」趁着2018的新開始，就梗係要「嚴刑迫供」會不會「拉埋天窗」啦。黃心穎說：「哈哈，呢個問題會唔會太遙遠？」馬國明跟着說：「呢個問題都幾遙遠。」（拍住拖先？）馬國明還是那句官腔答案：「了解中啦。」佢2個人真係夾過稿咁。
到做完晒訪問之後，心穎BB在台上演唱，不過唱完《小酒窩》接住唱《至少還有你》的時候，就疑似音響設備問題入錯歌，到主持余宜發出場幫手時，才入到個歌位唱落去。心穎仲尷尬咁同觀眾講「sorry」。在心穎BB唱歌期間，馬明更靜靜的由後台走出來站到台邊默默支持，還好黃心穎在第三次演唱順利入到位。好在係尷尬的事情發生在2017年，唔使唔開心喎，新一年新開始嘛。（至少還有馬明。）
主題: 【2018/1/1】［香港０１娛樂］黃心穎馬國明諗住結婚未？ 夾都冇咁夾：呢個問題都幾遙遠 
周一 1月 01, 2018 7:15 pm
