[2017/11/18]【香港01]馬國明失視帝網友話要罷睇TVB　上個月說好的力推盲俠王浩信呢？

【香港01]馬國明失視帝網友話要罷睇TVB　上個月說好的力推盲俠王浩信呢？ 2017-11-18



每逢到年尾又到出成績表嘅時候，不過今年就有啲唔同，咁多年嚟都係十一、十二月搞，可能因為今年係大台50周年要大搞，就首次延遲到出年一月舉行。其實由年頭開始網民已經個個福爾摩斯上身，年頭已經話《親親我好媽》嘅江美儀演虎媽做得神似，喺現實生活中係冇囝囡嘅佢演活咗怪獸家長，網民當時熱推佢做視后，點知過咗無耐，田蕊妮喺《迷》入面演技大爆發，好似真係痴咗線咁，大家又話要推佢做視后，諗好未㗎各位？

差唔多每一套劇播，網民都會換一換心水，就連王晶膠劇《賭城群英會》叻哥（陳百祥）演技屎，喊極都擠唔出一滴眼淚，睇到好尷尬都話要佢做視帝咁話。
認真講，其實大台播劇都好有部署，會分先後次序，重頭劇通常都會放年尾，所以近呢幾個月嘅《踩過界》、《同盟》、《使徒行者2》、《降魔的》都係啲會食糊嘅劇集，但一出閘《同盟》被指雷聲大，《使徒行者2》就好啲起碼可以估下UC是誰。反而《踩過界》由頭贏到尾，就算內地跑先播早一個禮拜，再加上擺係星期六日播都無礙收視，題材大膽新鮮，贏盡口碑，一播完已經即刻宣佈有Season2。而《降魔的》本身聽個名已經膠膠哋，加上馬國明做開膠劇，大家抱住睇笑話咁睇，估佢唔到竟然力壓眾星雲集嘅《誇世代》，網民大讚笑位膠位感情位都有齊，周五（17/11）嗰集講到原來成日坐馬明車嘅金鋼同小儀原來係佢過咗身嘅父母，鋪墊咗成兩個禮拜，呢條伏線真係世界級，唔少觀眾睇呢幕都睇到眼濕濕。



今次《降魔的》應該係馬明最成功嘅劇集。
綜合各方意見，今年視帝如無意外就係《踩過界》嘅王浩信同《降魔的》嘅馬明之爭，王浩信同馬明其實都做綠葉捱咗好耐，馬明好在當年拍神劇《衝上雲霄》同林峰、吳卓羲佢哋一齊被大台推做「新五虎」，之後就上位拍劇多數做第二男主角。而王浩信就慘啲，佢係等當紅小生北上搵銀，大台唔夠人用先推佢做男一，所以可以話佢哋兩個靜待機會已久，經驗值已經爆晒燈。
講到演技，無可否認大家一致公認王浩信喺《踩過界》入面扮盲難度值係SS級，王浩信仲特登去盲人中心取經，做足功課，像真度極高。而馬明唔知係咪個樣傻更更嘅關係，大家認定佢一直都係拍膠劇，今次膠演的士佬拍出水準，反差嘅感覺令大家眼前一亮，不過細心一諗，其實馬明之前《鐵馬尋橋》、《On Call 36小時》都係認真嘢，但可惜對手太強，最後都係落馬。

但有時唔可以單用演技分高下，人氣都好重要，近期馬明氣勢如虹，網民話如果今年視帝唔係馬明嘅話，就要罷睇TVB！咁嚴重？不過大台頒獎真係好神秘，好似選港姐講到要全民普選，一人有一票，最尾竟然Do姐（鄭裕玲）有2票直接揀冠軍，所以真係好難觸摸。陰謀論推測，大台呢2年明顯係要推王浩信做一哥，幾套劇都搵佢擔正，基本上呢舊肥豬肉就餵到嘴邊㗎喇，而馬明，大家當佢係民間視帝算啦。不過咁，今次頒獎禮第一次延後到一月先搞，等埋《溏心風暴3》先頒，好有可疑，今次由翠華Sponsor，成套劇講茶餐廳，相信翠華落重本，大台點都會分幾舊豬肉畀呢套劇交吓數嘅，而且根據網友善忘的特性，相信到時又會有推到夏雨做視帝嘅言論，唔信？睇下點！