【2017/11/15】【香港01]【降魔的‧專訪】馬國明都會上高登：網絡潮語我都會識嘅

【香港01]【降魔的‧專訪】馬國明都會上高登：網絡潮語我都會識嘅



《降魔的》中，馬國明一直被人大讚，除了演技了得之外，其貼地抵死的性格亦大受觀眾讚揚。由當年被人說是天然呆，本身樣子呆呆下之外，在頒獎典禮上的經典時刻也十分令人印象十刻。其實在上一套《心理追兇Mind Hunter》馬明飾演一個陰暗衝動的心理學家，演技已經受人力讚，今次在《降》也有出色的表現，年尾爭獎有望。


馬明演技好而家已經人人都知。（林迅景攝）
究竟如何由一個天然呆變成貼地召機呢？在接受《香港01》訪問時他說：「其實無話點樣做嘅，感覺貼地係因為本身個角色貼地呀嘛。戲入面佢（馬季）又唔係有錢，個角色本身已經好貼地，所以我哋都會用返啲貼地啂感覺囉，觀眾都會留意到我哋用返啲短褲、T-shirt，我知道有啲的士司機係好有型，好似掉低架車就可以去蒲咁，我哋唔係要嗰種。」雖然劇集好評眾多，不過都有人投訴太多粗口，「其實係嘅，尤其是趙永洪，佢係會講多啲，我哋度故仔嗰陣監製已經話俾佢呢個角色粗啲，我覺我ok嘅，大部份現實嘅的士哥哥都唔會太施文。」除了粗口，劇中也有一定的潮語出現，例如：推到完場、J一吓、有請小鳳姐等等，因為都有原因，他說：「有啲係編劇嘅，亦有啲係我哋現場爆少少咁，因為大家都知道係要啲乜嘢，好多時趙永洪都會爆肚。我都會上網睇呢啲嘢，所以某一啲網絡潮語我都會識嘅，我咩網都上架，香港討論區、高登都有上。」


原來馬明都有上高登。（林迅景攝）
上兩回的專訪都提及過，馬明對《降》的劇本是十分喜歡的，連《心》也是，不過他就慨嘆這套劇在香港不被大眾接納，他說：「《心理追兇Mind Hunter》劇本個佈局係好正，奈何可能有啲家庭觀眾未必睇得明，連我阿媽都話睇唔明，監製野心好大，我直情覺得有少少西片嘅格局。講返我個角色，因為佢本身係一個心理學家，佢女朋友俾人害死，佢好想查返係邊個殺死佢女朋友，佢本身係心理學家呀嘛，咁佢自己就營造返一個幻象令女朋友出現返。佢以前女鍾意食煙，佢一食煙女朋友就會出嚟叫佢唔好食，再將自己屋企書房佈置返做女朋友個office，完全一模一樣。喺心理學上，同一個環境、氣味下，幻覺就會容易出現。呢一個佈局，我一睇劇本就覺得好正，有少少荷里活佈局嘅電視劇，但係觀眾係睇唔明嘅，我都明白嘅。好似你第一次睇荷里活電視咁，第一次覺得好好睇但未必明，係要翻睇第二第三次先明。《心理追兇》係一個好好嘅劇本，但睇怕香港電視模式嘅人真係未必會明，但唔可以話香港觀眾明乜就去拍乜，作為一個創作，深嘢同觀眾明嘅嘢都要拍，正如早幾年TVB一直無拍鬼怪嘅題材，因＠返唔到大陸，無咗個市場，直頭呢幾年有返《鬼同你OT》、《一屋老友記》同《降魔的》，你會發現香港觀眾都鍾意睇鬼怪嘢，所以其實唔應該俾個市場焗住你拍咩，唔好限制自己個空間。」當然，公司一定想顧觀眾的口味，所以拍出來的劇也就比較一式一樣，也是無可厚非的。


《心理追兇Mind Hunter》入面佢真係做得好好。（電視畫面）
除了在香港，馬明也開始向大陸發展，始終內地賺錢的機會多太多，他說：「我而家拍緊大陸一套電影叫《美麗戰爭》，但係香港唔會上，因為個題材好內地嘅，今次成廿幾三十個女仔圍住我，因為係幾一套model嘅勵志片，仲有譚耀文份。我都想搵多啲錢，上一次上去拍我全廣東話，今次我都用返國語，希望可以適應返上面，譚耀文因為上咗去好多年，佢嘅經驗幫到我好多，可能對我將來上去發展都會有幫助。我而家都叫識多咗大陸嘅製片人，希望可以透過咁已傾多啲合作，佢哋唔會再睇邊個係視帝視后架喇。」原來連馬明都開始向大陸發展，希望TVB不要再流失人材喇。


唔通佢又要返大陸發展？（林迅景攝）
不過其實香港演員在大陸十分吃香，連馬明自己也感受到大陸導演對香港人的愛戴，但由於一些原因，香港演員在大陸的市場還未能全面展開，他說：「我地香港演員喺內地評價好高，一來因為我哋價錢平，同內地嘅紅星比我哋係好平。其次係大陸人覺得我哋香港演員好容易服侍，一啲都唔麻煩，我哋TVB出身就係咁樣，會對戲，會企喺度俾對方講對白（有啲位單頭講嘢，對手演員可能只係求其一個人），大陸嘅紅星係唔會咁做，佢哋無可能咁做，可能佢哋拍兩個大頭就走，其他鏡頭你搵替身同佢做，好誇張架。但大陸導演覺得香港演員好好，仲要抵用，奈何內地每套劇用香港台前幕後嘅人數仲有個限制，如果放寬，香港演員會愈來愈多機會，尤其是TVB捱慣嗰班，又識走位，又捱得唔麻煩。我聽過一個內地好紅嘅演員，佢著咗件好靚嘅衫去到片場，就同導演講我今日唔換衫架喇，拍就拍，唔拍我就走，連咗戲佢都唔理你。原來而家佢哋嘅氣燄係勁咁咁樣，你要連戲就唯有後期剪接，當然呢個係極端，唔係全部大陸演員都係咁，大家唔好誤會，只不過係大陸某啲好紅嘅演員已經去到咁，億億聲嗰堆，所以導演會覺得香港演員好好。」的確身價上億的演員，又真的可以有風駛盡


https://www.hk01.com/%E5%A8%9B%E6%A8%82/133784/-%E9%99%8D%E9%AD%94%E7%9A%84-%E5%B0%88%E8%A8%AA-%E9%A6%AC%E5%9C%8B%E6%98%8E%E9%83%BD%E6%9C%83%E4%B8%8A%E9%AB%98%E7%99%BB-%E7%B6%B2%E7%B5%A1%E6%BD%AE%E8%AA%9E%E6%88%91%E9%83%BD%E6%9C%83%E8%AD%98%E5%98%85