【香港01娛樂】15/11/2017 【收視分析師】降魔的誇世代收視平手　其實馬明已經贏咗

【香港01娛樂】15/11/2017 【收視分析師】降魔的誇世代收視平手　其實馬明已經贏咗

歡迎收睇逢星期三中午12點嘅《收視分析師》，上星期大市整體氣氛向好，9點半檔《降魔的》仍然係市場焦點，記得首播第一個星期已錄得23.7點收視，比《使徒行者2》僅僅低0.3點。加上上星期開始面對住8點半檔有勁多花旦小生撐場，兼重點台慶劇之一嘅《誇世代》來襲。估唔到《降魔的》今個星期仍然係有個唔錯嘅升幅，錄得24.5點，回升返0.8點，係同《誇世代》平手呀！

我認為《降魔的》會處於一個易升難跌嘅局面，因為題材夠晒新鮮，講鬼怪劇係TVB真係唔多，加上劇中好多都係新一代演員例如胡鴻鈞同劉佩玥，都成功引起唔少觀眾稱讚演技有進步，預計未來收視仍然有一個唔錯嘅增長。對於長線收睇《降魔的》嘅觀眾嚟講，估值仍然算健康，相信係一個唔錯嘅投資。而男主角馬明係今次劇中憑住「馬季」一角贏得不少掌聲，因為有好多觀眾都話佢喺TVB咁多年默默耕耘，如果仍然唔頒「視帝」獎項俾佢，完全講唔過去，不過香港人最擅長就是善忘，個多月前市場還吹奏《踩過界》的王浩信攞視帝，現在有《降魔的》就撐馬明，有理由相信之後《溏心風暴３》播映，大家又會話夏雨、黃宗澤攞視帝。

被譽為重點台慶劇之一嘅《誇世代》直到上星期收市平均錄得24.5點，其實在上星期一市場首日開市最高位報25.5點，果然係氣勢如虹！當然喇，有歐陽震華呢位「收視福將」頂住之餘，還要加上全台當紅花旦如李佳芯、譚凱琪、龔嘉欣、江嘉敏、麥明詩同陳嘉寶靚女撐住，再加森美同陳豪騷肌肉，24.5收視......Well，基本盤啦，但性價比，就《降魔的》贏哂，一睇就知《誇世代》budget多好多啦，公司重視邊套一睇就知，簡直係皇馬鬥南華，其實邊有得鬥？但結果是打成平手，《降魔的》應該要開香檳慶祝，馬明今次真係一個打廿個勁過葉問，他有冇視帝，獎座都其次，証明自己孭都飛，觀眾鍾意睇你，這一點才最重要，而《降魔的》成功說明劇本紮實，即使budget低，old school特技，觀眾都會鍾意，因為故事才是皇道，卡士、特技只是其次，蔗渣價錢都可以有燒鵝味道，TVB夠膽將《降魔的》列為台慶劇，証明高層還清醒，不是盲目認為大堆頭才是收視保証。