[2017.11.14] 馬國明認拖黃心穎：我哋無講啫，其實大家都明

《降魔的》裡面，馬國明飾演的馬季苦戀莊芷若（黃智雯），芷若一直向郭展明（黃子恆）靠攏，令到馬季相當沮喪。不過現實中馬明當然是春風得意喇，今年他被拍得跟黃心穎行街而傳出戀情，之後兩人在公開活動回答問題時亦表現曖昧，令不少人覺得他們已經在發展地下情，不過其實這段戀情已經浮面。


馬明希望大家給多一點空間（林迅景攝）

為什麼他們兩個一直都沒有一個明確的答案去確定對方的新聞呢？其實是有共識的，馬明在接受《香港01》訪問時表示，除非有一個重要的決定，否則都不太想將自己的戀情向公眾交代，他說：「（同心穎）Ok嘅，發展無乜大問題。其實無話名唔名份呢個問題，心穎好似喺其他訪問都講過唔會刻意講，如果再講就結婚架喇。而且我哋無講啫，但係其實大家都明架喇，有時我哋出去睇戲食飯，我哋都係任記者影相，或者有路人影我哋都無所謂嘅，呢方面我哋都幾公開架喇。我哋覺得無必要吓吓講，如果乜都講就會好煩，啫係唔會同人講我哋已經拖咗手喇、我哋鍚過喇、今晚佢上我屋企睇波、今晚我上佢屋企慶祝，無呢個需要去交代，始終拍拖係兩個人嘅事，我哋相處得舒服就夠喇。」


祝福他們吧。（資料圖片）
不過並不是話全部都收收埋埋，總有些事情會出來交代，到時大家可能就會知道，他說：「總之如果如果有朝一日係啱嘅，例如我哋結婚，我會同大家講，分手都會話俾大家聽嘅，如果有一日佢搵到第二個男仔，我都會話俾大家聽。（啫係我哋只會聽到唔係結就分？）哈哈，除非有啲好大件事，如果唔係都無咩需要吓吓回應，我同佢都覺得大家留意返我哋工作，唔係好想將拍拖擺喺咀邊。」的確，兩個人的事其實沒有大必要跟大家交代，大家還是給他們多點空間。


唔係結就係分！（林迅景攝）
馬明絕對是一個好老公，因為他所以事都會將家人在放第一位，而自己亦是「慳家益家人」，他表示自己不是豪洗的人，但用在家人身上一定不會慳，他表示：「人緊有地方你會使錢，無可能樣樣嘢都唔使，搵錢搵得咁辛苦，你緊會喺一啲自己鍾意嘅地方使錢。如果你問我，衣、食我都係使得好普通，我踢波同啲朋友都係茶餐廳碟頭飯。但係住我就好捨得使，我會用儲多啲錢去買間大啲嘅屋俾屋企人住」看來而家要再儲定一筆錢，將來結婚再買一間大屋了。


馬明對屋企人真係好好。（林迅景攝）

想知馬國明爆大陸拍戲的秘密，留意下集。

https://www.hk01.com/%E5%A8%9B%E6%A8%82/133383/-%E9%99%8D%E9%AD%94%E7%9A%84-%E5%B0%88%E8%A8%AA-%E9%A6%AC%E5%9C%8B%E6%98%8E%E8%AA%8D%E6%8B%96%E9%BB%83%E5%BF%83%E7%A9%8E-%E6%88%91%E5%93%8B%E7%84%A1%E8%AC%9B%E5%95%AB-%E5%85%B6%E5%AF%A6%E5%A4%A7%E5%AE%B6%E9%83%BD%E6%98%8E