[2017/2/16] [蘋果日報]撐枱腳兩粒鐘又斷正 43歲馬國明載心穎BB返香閨

[蘋果日報] [2017/2/16]
43歲馬國明同28歲黃心穎日前被《蘋果》踢爆一齊睇戲(新聞連結： http://bit.ly/2lQ0gAR)，就連C君都改口叫心穎BB做「馬太」，心穎死撐係朋友睇戲啫，仲係瞭解中，原來佢哋上周三又約去銅鑼灣食飯， 見得咁頻密……好難冇嘢囉!

今日又有周刊爆，馬明同心穎上周三拍拖，預祝馬明生日兼提早過情人節，去咗銅記食日本嘢，撐枱腳足兩個鐘，據知二人拍拖一個月，情人節正日又要開工，先決定提早慶祝，當日二人先喺鬧市行，成程馬明頭耷耷，一路同心穎BB傾偈，去咗開平道一間高級日本餐廳，人均消費2千蚊，一向慳家嘅馬明為心穎BB豪使，一出門口，馬明先睇吓周圍有冇記者，被發現時，馬明成個人即好尷尬，跟手佢哋一齊去利園攞車，送心穎BB返香閨。

心穎BB選港姐已講出自己係馬明超級fans，後嚟佢哋拍《為食神探》，心穎主動抄馬明牌，二人不時WhatsApp，又主動約對方去街，為咗配合馬明，亦將戀事低調啲，即使之前家姐黃心美開口嫌馬明老，心穎BB即幫口，話自己鍾意熟男，暗示同馬明唔會有代溝。

馬明同心穎今日回覆傳媒，佢哋否認拍拖，馬明話：「其實呢啲相喺早1、2個禮拜影，根本唔係乜嘢慶祝，朋友睇場戲，又或者食餐飯好正常啫。」至於生日願望，馬明就話：「慶祝今年生日同情人節都喺工作中度過，希望大家都身體健康，一家人平平安安。」心穎就話：「哈哈，唔使恭喜，0依家仲係了解中。」