【2018/6/22】[on.cc] 【成名血淚史】馬國明捱足8年先擔正

無綫熱播劇《宮心計2深宮計》受觀眾追捧，除咗宮内明爭暗鬥嘅劇情夠好睇外，主演之一嘅馬國明都好搶眼，皆因佢不時Man爆騷肌，唔止心穎BB睇到心心眼，連一班觀眾都流晒口水！已經「升呢」為當紅小生嘅馬國明冇話錫身，依然肯為劇集露肉，表現仲十分專業，不過其實佢未成名前都好捱得，仲做過唔少路人甲角色。

無綫「myTV SUPER」專頁亦剪輯咗相關片段供大家回顧，由劇集《洗冤錄》、《FM701》、《封神榜》到《陀槍師姐II》等，馬國明穿越古代做王爺，又試過做唐三藏、士兵同大夫之一，可惜統統冇對白，鏡頭仲少得可憐，難怪網友都話睇劇時發現唔到馬國明，要用放大鏡先搵到佢。去到《皆大歡喜》就好啲，終於有幾句對白可以講，雖然冇乜發揮，但馬國明依然交足戲，呢啲咪叫敬業囉！

機會係留畀有準備嘅人，跑龍套跑足幾年後，馬國明終於接到《衝上雲霄》嘅角色，仲憑靚仔機師形象爆紅，之後首度擔正演出《律政新人王II》，由零對白到男主角，呢條路足足捱咗8年，認真有血有淚。唔少網友都大讚馬國明好捱得，少啲毅力都堅持唔到，亦有網友話馬國明當年有少少Baby fat，個樣相當青澀，差啲認唔到佢，果然仔大十八變！


馬國明捱足8年先去到依家呢個位！