【01娛樂】【C9特工】高海寧嫁賣菜佬馬國明　封胸唔性感：而家啲師奶好靚㗎

【01娛樂】【C9特工】高海寧嫁賣菜佬馬國明　封胸唔性感：而家啲師奶好靚㗎

今日一眾《C9特工》為新劇出席造型記者會。(陳順禎攝)

無綫新劇《C9特工》今日舉行記者會，再度擔任女主角的高海寧在劇中是特工，亦是師奶，基於角色設定，一貫的性感演出將不會於新劇出現。「一啲唔性感架，同埋著褲居多，最多都係著得貼身少少，因為做特工點都有啲動作戲。去到師奶戲份時，監製仲會叫我將打底嗰件背心拉高啲再高啲。（係咪即係做黃面婆？）而家啲C9都好靚架，有好多靚太架，但都真係要化淡妝。」高海寧說。
沒有了性感演出，觀眾可專注於高Ling的演技，而且劇中更有兩大男神──馬國明及黎諾懿一同搶奪高Ling，發展出三角感情線。對於有兩位猛男傍住拍劇，高Ling坦言沒壓力，反而覺得安心：「馬明之前合作過《賭城群英會》，嗰時同佢拍咗3個幾月，都知佢係個nice又無脾氣嘅人，所以同佢相處好舒服唔會有壓力。至於黎諾懿，我哋合作咗好多次喇，頭先佢仲話：『見到高Ling都覺得悶喇。』我話：『我見你唔悶咩？』所以基本上對住佢兩個都唔係太大壓力嘅，反而俾到安心感我，我先可以放鬆啲去睇下擦得出咩火花。」

兩位男神開玩笑說有要加親熱戲，高Ling霸氣回應：「加咪加囉，邊個怕邊個啫，我唔怕架！」（陳順禎攝）

火花，或者在兩男一女的劇情中擦出，亦可能在親熱戲中擦出，事關黎諾懿曾笑指劇本首幾場戲便已有馬國明與高Ling的床戲。對於床戲，高Ling打了個突：「有床戲咩？點解我唔知嘅？實係佢兩個亂講啦，成日都話要加要加，又話要低胸啲。（如果佢哋真係說服到監製咁點算？）加咪加囉，邊個怕邊個啫，我唔怕架！」
其實，高Ling已不是第一次擔正劇集女主角，對上一套是2017年拍畢的《婚姻合伙人》。對於首部擔正女一的劇遲遲未播出，有指是劇情一般成為倉底劇，問到高Ling會否怕《婚姻合伙人》拍出無期，她說：「上年4月先拍完，啱啱1年啫，而且我上年年尾先去配音，因為我拍到最後失晒聲，好多音要配。然後我見啲配樂依家都做晒，所以我估都快出架喇。」她還補充該劇故事很吸引，與楊明飾演夫婦的對手戲高潮一浪接一浪：「其實個故仔好好睇，平時啲故仔可能慢慢慢慢先入高潮，我哋一嚟就嘭嘭聲架喇！男女主角兩人性格都係硬碰硬，所以好多嗌交戲，嗌完之後又突然間狂錫，好激烈。我諗呢套劇係我拍最多錫戲嘅一套，基本上係多過我其他所有嘅作品加埋。」