【娛樂OLO】2/11/2017 膠劇御用主角？《降魔的》馬國明喜感網民讚賞

【娛樂OLO】2/11/2017 膠劇御用主角？《降魔的》馬國明喜感網民讚賞

雖然馬國明係無綫嘅親生仔，不過經常被懷疑大台係咪好鍾意整蠱佢，因為經常都要佢拍膠劇，就好似《流氓皇帝》、《同撈同煲》、《少年四大名捕》、《賭城群英會》等等，搞到每次都被人插佢演技差，仲俾人笑佢有拍膠劇嘅膠命水。

今次佢拍台慶劇《降魔的》，一睇預告片啲CG就已經膠到發笑，真係令人好擔心馬明係咪又再一次跌入膠劇陷阱。劇中飾演陰陽眼的士司機，佢更會接載「其他空間」嘅生物，再喺當中穿插降魔情節再撈啲感人故事。

不過啱啱開播咗三集，網上竟然好評如潮，有人話節奏明快、好好笑、有追看嘅衝動等等。而今次亮點仲喺馬國明身上！

好多網民都話佢嘅打扮同表情都十足十成個的士佬咁，而佢嘅經典天然呆表情就更加令到觀眾冇得唔追。網民亦留言話「馬明真係好似的士佬，演到好市井的感覺」、「原本諗住睇頭15分鐘就去沖涼，點知吸引咗睇晒成集先去沖～希望可以KEEP住咁好睇！！馬明應該係時候發圍喇！」、「第一集好睇！有少少驚嚇位，但更多的是真正同人情味，令人想追看落去，希望可以KEEP住。而且好似得廿集，應該唔會爛尾呱～BTW，馬明呢個角色好似好討好咁」等等。

除咗網民，就連馬明自己都覺得的士佬呢種比較貼地嘅角色好啱佢，講起喺劇中嘅打扮，佢都不禁講話同佢平時冇太大分別。

難得有劇集受到好評，希望無綫可以繼續啦！另外，難得觀眾咁喜歡，唔知馬明有冇機會憑呢套劇榮升視帝呢？