行善不張揚 港星充滿愛心低調做善事

參加慈善活動就係好多藝人都會做嘅事，但日常生活都依然能夠保持行善，仲要唔畀人知就真係十分難得。就好似哥哥張國榮咁，曾經低調探訪病童，仲話千萬唔可以向傳媒曝光，因為唔係搏宣傳。之後好多網民都話曾經接受過哥哥仗義幫忙，名符其實係冇明星架子嘅大好人！今時今日，娛樂圈都有唔少低調行善嘅藝人，其中一個就係古天樂。

古天樂
身為天王巨星嘅古天樂行事為人一向唔高調，原來佢連做善事都一樣咁低調。著名導演爾冬陞曾經喺微博post過一張古仔捐錢起學校嘅名單，令佢一直秘密喺內地做慈善工作一事曝光。原來古仔自2008年汶川地震之後，眼見小朋友痛失家園同讀書嘅地方覺得好心痛，於是決定成立「古天樂慈善基金」低調捐錢做好事！唔經唔覺，佢已經起咗79所教學樓，等小朋友可以重新返學。古仔嘅善行令網民like爆，覺得佢愛心爆棚，不過古仔就回應話，佢只係本著善心做好事，並唔係講個錢字，仲話冇目標起幾多間學校，善事會繼續做落去。嗚啊～咁有愛心，男神之名當之無愧！

劉德華
另一位男神就當然係劉德華啦。華仔被人稱呼做「民間特首」，唔單止因為佢勤力同埋錫粉絲，更加因為佢唔出風頭咁做善事。華仔唔單止積極參與救災嘅捐款活動，但凡有各地有天災發生，佢都盡所能慷慨解囊，而且佢仲非常支持本地傷殘運動員嘅發展！因為殘奧獎牌得主獲得嘅獎勵唔多，華仔眼見佢地付出同收穫唔成正比，曾經親自打造金牌畀每一個殘奧香港選手，希望鼓勵佢哋。佢仲成立慈善基金，每年都私人捐獻獎金，希望可以支持佢地日常生活，等佢地可以唔使因為生計而放棄運動。華仔行善不為人知，更加反映佢嘅真誠同埋無私，絕對唔係為「做騷」而捐，好波！

曾偉權
除咗天王巨星之外，娛樂圈中仲有好多藝人都非常有善心，就例如大台御用王爺曾偉權。曾偉權演技好就係人都知，但佢好照顧流浪小動物呢件事就未必好多人知喇。佢周不時都會post同貓貓狗狗嘅合照，仲自發做義工幫流浪貓狗善終。早年曾偉權已經開始呢項行動，每次見到流浪貓狗被撞死，都會先移動物屍體到馬路邊，再叫食環署幫手處理，而佢宜家一樣不遺餘力，會放定黑膠袋喺車尾箱，一旦有起事上嚟，都可以送小動物一程。除此以外，佢自己都有收養流浪狗，仲經常呼籲駕駛人士要小心揸車，唔好撞倒流浪動物，非常有愛心。

馬國明
馬國明拍戲就多，佢做義工你又見過未？之前馬明被人影到著住背心，衣著非常簡樸咁不停搬紙皮箱，當時佢個樣極之專心，毫無明星架子。後來發現原來佢係幫屋企人準備義工探訪活動嘅物資，所以咁落力搬箱。唔少網民對於馬明低調行善都讚口不絕，覺得佢非常之man！馬明表示，以前佢經常都會跟屋企人一齊去做義工，不過最近拍戲比較忙，所以冇時間參與，不過一趁得閒就會幫手，希望可以為善事出一分力咁話，真係愛心暖男～