[2016/12/30][都市日報] 不是明星 馬國明

2016/12/30         [都市日報]           不是明星 馬國明




沒聽過有人討厭馬國明，真的，大概他暫時與小圈子頒獎禮獎項無緣，但他卻有更難得的觀眾緣。有人說，馬明沒有星味，或許是，你可曾見過巨星當街搬貨？但這不重要，反正他最吸引的就是夠貼地、平易近人，成為巨星亦非他做藝人的初衷，「隨遇而安囉，當初嘅心態都係因為鍾意做戲啫，又唔係想做明星或者攞獎先入行。」

撰文：鄧穎琪 攝影：Ho

近日播映的《流氓皇帝》被指是倉底貨，但網友最強烈的反應竟是不值馬明慘成炮灰，鬧無綫將他投閒置散。馬明講粗口，一向站在道德高地的網友畀Like，讚他真性情；他直認上鹹網，Like，他夠坦率；他幫家人搬貨，Like，他是孝順仔；到台慶屢次「灰足36小時」，照Like，他很戇直。這就是馬明的觀眾緣，其他人羨慕不了。

發火冇人驚
《流氓皇帝》的朱錦春如果活在2016，定當被視為蠢材，直認思想舊派的馬明說：「依家啲人一嚟就講隻股票賺咗幾錢，層樓升咗幾多，比較現實。呢套劇就係講香港人以前嘅情懷，你見依家好分裂，立法會開會都鬧嚟鬧去，甚至打架，以前冇咁多拗撬。」馬明的形象是個好脾氣的戇男，筆者好奇他怎樣才會發嬲，但原來他通常都只會惱自己做得不好，「好多人見到我發火都唔會驚，我好少用粗口好狠咁鬧人，但我好驚人煩囉！你每樣嘢重複好多次，我就會覺得煩，但我唔會鬧人嘅，最多話畀你聽，喂，好喇喎。」僅此而已？難怪別人不怕啦！馬明坦言成年人講粗口好正常，有時旨在搞氣氛引大家笑，不需要太假扮純情，總之其底線就是不惡意傷害人，也絕不在小朋友面前爆粗。

一等一孝子
當年「奧運六星」受無綫力捧，但陳鍵鋒、林峯及吳卓羲等都先後離巢，北上掘金，偏偏馬明卻在幾個月前跟無綫續約，對內地公司高薪挖角亦不為所動，「錢當然佢哋大嚿啲，但要我簽4、5年，每年有10個月喺上面，問心，我唔係想過咁嘅生活。我鍾意每日見到我阿爸、阿媽，佢哋年紀開始大，一個唔覺意有邊個行咗，啲時間追唔返㗎，我唔想失去咗先嚟後悔。」馬明絕對是個一等一孝順仔，當日他接連做了幾個訪問，換了幾套衫，拍照時他說了一堆原因，又謂：「呢件衫係我今日最鍾意㗎，我特登揀，因為我阿爸日日都攞《都市日報》睇。」這絕非客套話，而是他確實處處以家人行先，「你問我依家最想要乜，唔係攞咩獎或者搵幾多錢，我淨係想同屋企人一齊，個時間愈Last得耐，我愈滿足。」

不排除閃婚
自從陳豪等封盤後，馬明便成為圈中碩果僅存的筍盤，明明條件好得很，卻偏未有着落，其實他一直有跟不同的女士約會，但年紀愈大，愈難搵對象，「兩個人相處要睇大家目標，生活嘅軌迹、要求，就算我依家搵到個我好鍾意佢，佢好鍾意我嘅女仔，咁又點？係咪就結到婚呢？可能個女仔話10年內都未想結婚同生小朋友住，要搏殺，咁都幾難一齊囉。」他不諱言想生B，怕自己50、60歲才做爸爸會沒有精力陪小朋友踢波，所以只要一揀啱對象，隨時有機會閃婚。多年來，馬明公開過的女友不多，他解釋：「未穩定嘅無需要公開，太煩，太多嘢要交代喇！拍拖又要同大家講，Touch Wood分手又要同大家講，真係幾煩。」噢，差點忘了他很怕煩，惟有靜靜等他宣布封盤啦！






▲馬明（左）直言不介意講緋聞，因為可以搵錢，如早前他跟洪永城就以「情敵檔」出活動。


▲今年陳展鵬拎視帝時，馬明再發揮天然呆本色，被指 「眾人皆企我獨坐」，網友當然又讚他可愛。


▲《流氓皇帝》劇情橫跨幾十年，所以周麗淇與馬明要扮演老角。

資料來源:
http://www.metrodaily.hk/metro_news/%e4%b8%8d%e6%98%af%e6%98%8e%e6%98%9f-%e9%a6%ac%e5%9c%8b%e6%98%8e/