[2016.12.16][蘋果日報] 42歲馬國明扮花0靚 今年視帝又陪跑

[蘋果日報]
42歲馬國明扮花0靚 今年視帝又陪跑
2016.12.16

喺無綫17年嘅馬國明呢？42歲，圈中著名鑽石黃老五，一擲二千萬擲買太古城特色戶。與之同期跳十字步嘅林峯、吳卓羲、陳鍵鋒、黃宗澤同黎諾懿，走剩佢同黎。

之前馬國明因為遲遲未動筆同無綫續約，慘被打入雪櫃，依家即使續咗約，仍然好似kick kick哋，工作雖然排得密麻麻，好似啱啱拍完部《降魔的》，即刻去咗新加坡登台搵錢，明年仲有部《深宮計》。默默耕耘認真工作，但好多嘢都唔係佢控制。

馬國明「新劇」《流氓皇帝》，雪藏兩年終於「上水」，但cut淨16集(另一說法係17集)，今年馬國明只係憑《為食神探》，同陳展鵬、黃宗澤、廖啟智、王浩信爭視帝，有報道話佢「又陪跑」，有報道稱其劇集專攝「炮灰檔」，不少網民指不忍已屆中年的馬明仍要扮黃毛小子，紛紛留言:「俾啲好角色佢啦！」

順帶一提，與其話佢係「陪跑王」、「炮灰王」，不如話馬國明係客串王。因為佢份人易話為冇咩所謂，監製拍膊頭搵佢幫手嗰陣，佢都即時答應，所以成日見佢客串「亂入」，nice到冇朋友。同樣，派到咩角色俾佢，佢都唔會say no……

之前馬國明接受訪問時都話，對於爭視帝，佢好隨緣，呢兩年都係。上年《梟雄》馬國明係客串，今年套《為食神探》……浪費咗成班演員。馬國明話:「我啲劇都唔係啲攞獎嘅戲，係大家笑完就算嘅戲。大家心照。」咁對爭視帝有冇信心？佢接受傳媒訪問時就好坦白:「獎我不嬲好隨緣，我愛獎金多啲。」

由《回到三國》到《為食神探》到《流氓皇帝》，馬國明戲路都係搞笑，有網民不忍佢要「扮後生」、「做戇X仔」、「小丑」，其實佢對演喜劇冇乜信心，但作為演員，佢覺得應該咩都磨練下，「唔可以話避咗唔拍」:「演員應該咩都要識演，總之信心就練到有信心囉。」