[蘋果日報] 2015.12.27
無綫助理總經理杜之克上場之後，唔單止盛傳製作部戲劇製作總監曾勵珍失勢，搞到成個戲劇組大地震咁滯，而且本報收到可靠消息，由於行政總裁李寶安下令「優化」戲劇組，所以杜之克睇晒手頭上拍好嘅劇集之後，認為有5部劇拍得好差，所以日前開內部會議後決定將嗰5部拍好咗嘅劇集冇得留低，即係抽起唔播出街。
呢5部被無限期雪藏嘅劇集，包括由李添勝監製及黎耀祥同胡杏兒主演嘅30集劇《巾幗梟雄之諜血長天》、潘嘉德監製及馬國明同周麗淇嘅20集劇《流氓皇帝》、文偉鴻監製及張兆輝同陳敏之主演嘅20集劇《性在有情》、關永忠監製同陳慧珊及黃智賢主演嘅20集劇《波士早晨》，以及張乾文監製同郭晉安及楊怡主演嘅25集劇《末代御醫》。雖然平均一集劇嘅製作費起碼60萬，而《巾幗梟雄之諜血長天》、《流氓皇帝》、《末代御醫》3部劇重有去內地拍外景，外景嘅話每集成本起碼80萬以上，而家5部劇總共拍咗115集，無綫起碼掉咗7500萬落鹹水海。
據悉杜之克覺得呢幾部本土製作好唔掂，所以經篩選後寧願大刀濶斧雪藏呢5部劇，將啲錢掉落鹹水海算數，寧願黃金時間播外購劇，好似聽晚咁，黃金時段就會播內地劇《無心法師》，而無綫手頭上重買咗好多內地劇，比香港觀眾慢慢「嘆」！
今日打比馬國明，問佢知唔知《流氓皇帝》被雪藏冇得播，佢話:「未經證實，所以冇回應。」至於陳敏之就話:「冇聽過，部劇我做女主角，如果冇得播當然好可惜，但作為演員都冇辦法，我會尊重公司嘅決定。」
話時話，抽起嗰5部劇，除咗《巾幗梟雄之諜血長天》係曾勵珍條line之外，其餘4部都係離開咗無綫嘅前朝高層梁家樹旗下監製拍落，所謂一朝天子一朝臣，亦即係早排羅家英喺微博所講嘅:「梁系已飄蓬葉落，你明白的。」
![[2015.12.27] 《流氓皇帝》5部劇被插拍得差 大台抽起唔播 Empty](https://2img.net/i/empty.gif)
主題: [2015.12.27] 《流氓皇帝》5部劇被插拍得差 大台抽起唔播 ![[2015.12.27] 《流氓皇帝》5部劇被插拍得差 大台抽起唔播 I_icon_minitime](https://2img.net/s/t/15/22/45/i_icon_minitime.gif){kind=icon}
周二 12月 29, 2015 10:36 pm
